Meu vello amigo e admirado poeta:
Veño de ler con grande asombro
algunhas das cousas que dixeches no mitin de Vilalba. Non alcanzo a comprender
como unha persoa culta e intelixente coma ti e que tantos anos militou no BNG
pode chegar a dicir que “Nunca Galiza en tan pouco tempo tivo tanta presenza e
recoñecemento” nas Cortes do Estado como nos catro meses da pasada lexislatura.
Talvez xa non te lembras do impacto que tivo sobre o conxunto da sociedade
galega a chegada do BNG ao Congreso en 1996, que incluso estivo ás portas de
pasar de 2 a 5 deputados/as nas seguintes eleccións. Mais non falo só do plano
simbólico, da expresión política do país, dunha expresión soberana, que
endexamais precisou pedir permiso a ningún líder estatal para falar nas Cortes,
porque, como ben sabes, o BNG non foi nunca complemento ou apéndice de ningunha
organización da metrópole. Chegou alí coas súa forza, coa que lle deu o propio
pobo galego en cada momento, sen ataduras e sen outros límites que a defensa do
país. Pero, repito, non falo só de ser a voz de Galiza nas Cortes. Falo tamén
do volume e da importancia do traballo parlamentario que realizou o BNG en
Madrid. Cando alguén de En Marea chegue a superar en número de iniciativas e en
intervencións a calquera dos deputados e das deputadas que tivo o BNG, entón poderás
dicir o que dixeches en Vilalba. Mentres tanto, Miguel Anxo, meu vello amigo
Miguel Anxo, humildade, moita humildade, que moito tedes que traballar aínda
para estar á altura de calquera das persoas que representaron ao BNG na
Carreira de San Xerome. E se queres podes coller catro meses -os que ti
queiras- do traballo parlamentario de Francisco Rodríguez, de Olaia Fernández
Davila ou de Francisco Jorquera e comparalos cos catro meses de cada un e cada
unha de vós. Nin punto de comparación. Só hai que ir á web do Congreso para
comprobalo. A explicación, claro, tamén está en que o BNG desde o Grupo Mixto
tivo sempre toda a liberdade para subir á tribuna do Parlamento cada vez que o
precisou. Vós, xa o sei, tendes que pedir permiso a Pablo Iglesias, Íñigo
Errejón ou Carolina Bescansa, e ademais, tamén hai que dicilo, non sempre se
acordan de que estades alí. Nunha cámara parlamentaria hai que ter capacidade
de intervir e liberdade plena para defender o programa. Recorda que
precisamente para recuperar esa liberdade, Castelao e Otero Pedrayo mesmo
chegaron a abandonar a minoría republicana galega nas Cortes Constituíntes.
Seredes vós quen de facer iso -os de Anova, digo- se Podemos segue a marcarvos
o discurso e a axenda parlamentaria como xa o fixo nos catro meses desta
lexislatura?
A outra grande reflexión que
fixeches nese mitin de Vilalba é que agora “En Marea é a forza das esquerdas
galegas e o voto útil da xente común”. E eu pregúntoche, Miguel Anxo, e cando
en 1977 o BN-PG obtiña 22.771 votos (o 1,98%), o PSG 27.197 (o 2,36%) e o PSOE
175.127 votos (o 15,20%), onde estaban as maiorías sociais de esquerda e a xente do común? E cando en 1986 o BNG
conseguía 27.049 votos (o 2,08%) e o PSOE 458.376 votos (o 35,27%), onde estaba
o corpo social de esquerdas e a xente do común deste noso país, apoiando ao
PSOE ou respaldando o nacionalismo galego? Si, Miguel Anxo, todas as razóns que
vós atopades agora para confluír coa esquerda estatal, coa nova e mais coa
vella esquerda española, puidémolas ter no 77, no 79, no 82, no 86…, porque a
grande maioría social que se move simplemente en coordenadas de esquerda ou
incluso dunha certa esquerda galeguista estivo sempre, agás nos anos noventa,
arredor do PSOE, e non por iso deixamos de reafirmarnos, verdade, na construción
do proxecto común nacionalista, na autoorganización política, na confianza en
nós mesmos, na creación da conciencia nacional. Dá a impresión que agora hai
quen pensa máis “no ideal da victoria que na vitoria do ideal”. E non me
poderás negar que o resultado de toda esa vosa estratexia é un polo
nacionalista galego máis débil e unha sociedade galega cada vez máis
españolizada. Se hoxe Anova concorrese en solitario ás eleccións seguramente non
obtería nin un só deputado, porque vós mesmos lle abristes as cancelas aos
partidos estatais e lle destes unha lexitimidade diante da cidadanía galega que
hai uns anos non tiñan en amplos sectores sociais. Voucho dicir con
sinceridade: eu vexo na vosa práctica política unha deserción clamorosa no
combate intelectual e político por crear conciencia nacional, por fortalecer
unha dinámica política de país e por consolidar unhas forzas políticas propias que acaben por
liderar a alternativa política para Galiza. E non me digades que agora hai unha
emerxencia social que xustifica esa estratexia de unidade electoral coa
esquerda estatal, porque o noso país, Galiza, está nunha situación de
emerxencia desde hai decenios. E tampouco me recordedes, por favor, o da Frente
Popular, por decencia intelectual, porque non resiste a máis mínima comparación
histórica. Desde o noso escaso saber xa o temos comentado noutras ocasións,
pero moito mellor ca min xa o explicou o profesor Xavier
Vence nun magnífico artigo hai varios anos, despois das eleccións galegas de
2012 (“Castelao, Bóveda e o nacionalismo esgazado”).
En fin, Miguel Anxo, que queres
que che diga? Para min aínda seguen a ter plena vixencia estas palabras que
escribiu quen ti ben sabes: “case nunca un país colonial precisado dun proceso
revolucionario elixíu en votacións de democracia burguesa aos seus afervoados
loitadores, aos seus máis lúcidos organizadores, aos seus auténticos líderes”. Alexandre Bóveda é o mellor exemplo.
De irmán a irmán.
Ningún comentario:
Publicar un comentario